അപരാഹ്നത്തിലെ മഴ

ചില്ലുകൂട്ടിനുള്ളിൽ
സ്വരസ്ഥാനം തെറ്റിയുലഞ്ഞ
അസ്വസ്ഥതയിലോ
അശാന്തി കുടികിടപ്പവകാശമേറ്റിവന്നത്
ഓഹരികളുടെയൊപ്പുകടലാസിലോ
പുതുമ പൂവുകൾവിരിയിക്കുന്നത്
മിഴിയിൽ വറ്റിയ നീർത്തുള്ളിയോ
മഴയായി വീണ്ടും പെയ്യുന്നത്
കുളിർന്ന പ്രഭാതമേ
പുണ്യാഹമിറ്റിക്കും ദർഭനാളങ്ങൾക്കെങ്ങനെ
വിപ്ലവഗാനമാലപിക്കാനാവും
അരയാലിൻതറയിലിരുന്നാദിമകാവ്യം
വായിക്കും പ്രാചീനചിന്തുകൾ
തൊട്ടെടുത്തുവോ
കത്തിയെരിയും മദ്ധ്യാഹ്നത്തിൻ കനലുകൾ..
വെയിൽനാളങ്ങളിൽ തുള്ളിയോടിമാഞ്ഞ
നിഴൽപ്പാടങ്ങൾ കൊയ്തെടുത്തുവോ
മണ്ണിന്റെ മധുരിമ..
അപരാഹ്നത്തിൻ മഴയിലൊഴുകി മായുന്നുവോ
മനസ്സിലെ ദൈന്യക്കൂടുകൾ....