നവംബർ മഴ...
അരികിൽ പെയ്യും
നവംബർ മഴ...
പാതിയുടഞ്ഞ മൺവിളക്കിനരികിൽ
മയങ്ങും പകൽവെട്ടം..
ഇമയനങ്ങുന്നതും നോക്കി
ജാലകപ്പഴുതിനരികിൽ
മുഖാവരണമിട്ടിരിക്കും കുലം..
പകിട്ടുമങ്ങും പുതുചേലകൾക്കായ്
പുരാണം രചിക്കും സേവകർ...
അറയിലൊളിക്കാനാവാതെ
പുറത്തേയ്ക്കൊഴുകും കടൽ..
ഈറനാർന്ന മുഖവുമായ്
അനന്തചക്രവാളം..
കൂടുകൾപണിതാണിയേറ്റിയ
സ്വാർഥതയ്ക്കരികിൽ
നിസ്സംഗം നിൽക്കും ഋതുക്കൾ...
പുൽമേടുകളിലൂടെ
പകൽ നടന്നുനീങ്ങും
അപരാഹ്നത്തിൽ
മിഴിയിലുറയുന്നുവോ
നവംബർ മഴ....
No comments:
Post a Comment