മുന്നിലുണരും പ്രഭാതങ്ങളിൽ
മുന്നിലുണരും പ്രഭാതങ്ങളിൽ
തുടുപ്പാർന്നൊരീണമുണരുമ്പോൾ
സ്വർണ്ണനൂൽതുമ്പിലൊരു
മനോഹരമാം കാവ്യമുണരുന്നുവല്ലോ
എങ്കിലും പ്രകാശത്തിൻ
മൺദീപങ്ങൾക്കരികിലും
മനസ്സിലെയിരുൾ മായ്ക്കാൻ
നിങ്ങൾക്കാവാത്തതെന്തേയെന്നാലോചിച്ച്
ഭൂമിയിന്നാകുലപ്പെടുന്നുമില്ല
വിജയരഥത്തിൽ
പരാജയത്തിനാവരണമഴിയ്ക്കാനാവാതെ
ശിരസ്സുതാഴ്ത്തിയരികിലൂടെ നീങ്ങും
സന്നദ്ധദൗത്യമേ
നിങ്ങളുടെ താഴേയ്ക്കൊഴുകും
കാഴ്ച്ചപ്പാടുകളൊരു
സ്വർണ്ണതകിടിലെഴുതി
ശിരസ്സിലേറ്റണമെന്നൊരു
മനോവൈഷ്യമ്യവും
ഇന്നീശരത്ക്കാലത്തിനില്ലയെന്നറിഞ്ഞാലും
നിങ്ങളുടെ പ്രകടനശാലയിലുണരും
ശബ്ദഘോഷങ്ങളിലിന്നൊരു
വിസ്മയവുമുണരുന്നുമില്ല..
അതേപോലെയൊഴുകുമാവർത്തനങ്ങളുടെ
പലേകാലങ്ങളും കണ്ടുകഴിഞ്ഞിരിക്കുന്നുവല്ലോ
അതിനാലാവുമതു വീണ്ടും കാണുമ്പോൾ
നിങ്ങൾക്കിതു മാത്രമേയറിയൂ
എന്നൊരതിശയവുമുണ്ടായിപ്പോകുന്നതും....
