മഴക്കാലരാഗം

ചായം പൂശിയ പുതിയ
ചുമരിനപ്പുറം
അനന്തമായ കടലായിരുന്നു
അകലെ ദേവലോകം
ദേവദുന്ദുഭിയിലുണരുമ്പോൾ
വീണയിലെ തന്ത്രികളും
മെല്ലെ ചലിക്കുവാൻ തുടങ്ങി
നിഴൽഘടികാരങ്ങൾ
മുകിൽതുടിയിലുലഞ്ഞ നേരം
അക്ഷരകാലം തെറ്റിയ ഒരു സ്വരം
ലയം തേടിയരികിലേയ്ക്കു വന്നു
ചരൽക്കൂനകളിലെ
മൺതരികൾക്കിടയിൽ
കാലം തിരഞ്ഞു
ഒരിത്തിരി ദൈന്യം,
ഒരു തുടം കണ്ണുനീർ
സ്മൃതിയിലൊരു
വിസ്മയതുമ്പിലേറി
ചിത്രശലഭങ്ങൾ
ചിറകുനീർത്തിയെത്തും
പിച്ചകപ്പൂവുകൾക്കരികിൽ
മഴ പെയ്തൊഴിയുമ്പോൾ
മനസ്സിലുണർന്നു
ഒരു മഴക്കാലരാഗം...